Առաւօտ լուսոյ,

Արեգակն արդար,

Առ իս լոյս ծագեա։

Բըղխումն ի Հօրէ,

Բըղխեա ի հոգւոյս,

Բան քեզ ի հաճոյս։

Գանձդ ողորմութեան,

Գանձիդ ծածկելոյ,

Գըտող զիս արա։

Դուռ ողորմութեան, 

Դաւանողիս բաց,

Դասեցո վերնոցն։

Երրեակ Միութիւն, 

Եղելոց խնամող,

Եւ ինձ ողորմե՛ա։

Զարթի՛ր, Տէր, յօգնել,

Զարթո՛ ըզթմբրեալս,

Զուարթնոց նըմանել։

Էդ Հայր անըսկիզբն,

Էակից Որդի,

Է միշտ Սուրբ Հոգի։

Ընկալ զիս գըթած,

Ընկալ ողորմած, 

Ընկալ մարդասէր։

Թագաւոր փառաց,

Թողութեանց տըւող 

Թող ինձ ըզյանցանս։

Ժողովող բարեաց,

Ժողովեա եւ զիս,

Ժողովս անդրանկաց։

Ի քէն Տէր հայցեմ,

Ի մարդասիրէդ,

Ինձ բըժըշկութիւն։

Լեր կեանք մեռելոյս,

Լոյս՝ խաւարելոյս,

Լուծանող՝ ցաւոյս։

Խորհըրդոց գիտող,

Խաւարիս շնորհեա,

Խորհուրդ լուսաւոր։

Ծընունդ Հօր ծոցոյ,

Ծածկելոյս ստուերաւ,

Ծագեա լոյս փառաց։

Կենարար փրկիչ,

Կեցո ըզմեռեալս,

Կանգնեա զգլորեալս։

Հաստեա հաւատով,

Հաստատեա յուսով,

Հիմնեցո սիրով։

Ձայնիւս աղաչեմ,

Ձեռօքս պաղատիմ,

Ձիր բարեաց շնորհեա։

Ղամբարամբ լուսոյ,

Ղեկավար ճարտար,

Ղօղեալս ամրացո։

Ճառագայթ փառաց,

Ճանապարհ ինձ ցոյց,

Ճեմել ի յերկինս։

Միածինըդ Հօր

Մոյծ զիս յառագաստ,

Մաքուր հարսանեացդ։

Յորժամ գաս փառօք,

Յահագին աւուրն,

Յիշեա զիս Քրիստոս։

Նորոգող հնութեանց,

Նորոգեա եւ զիս,

Նորոգ զարդարեա։

Շնորատու բարեաց,

Շնորհեա զքաւութիւն,

Շնորհեա զթողութիւն։

Ուրախացա Տէր,

Ոգւոյս փըրկութեամբ,

Ոյր վասն եմ ի սուգ։

Չար մըշակողին,

Չար սերմնանցն որ յիս,

Չորացո զպըտուղ։

Պարգեւիչ բարեաց,

Պարգեւեա իմոց,

Պարտեացս զթողութիւն։

Ջուր շնորհեա աչացս,

Ջերմ հեղուլ արտօսր,

Ջնջել ըզյանցանս։

Ռետինըդ քաղցու,

Ռամ հոգւոյս արբո,

Ռահ ցոյց ինձ լուսոյ։

Սեր անուն Յիսուս,

Սիրով քո ճմլեա,

Սիրտ իմ քարեղէն։

Վասըն գթութեան,

Վասն ողորմութեան,

Վերըստին կեցո։

Տենչալի տեսլեամբ,

Տուր ինձ յագենալ,

Տէր Յիսուս Քրիստոս։

Րաբունդ երկնաւոր,

Րոտեա զաշակերտս,

Րամից երկնայնոց։

Ցօղ արեան քո Տէր,

Ցօղեա ի հոգիս,

Ցընծասցե անձն իմ։

Իիւծեալըս Մեղօք,

Իիւծեալ աղաչեմ,

Իիւսեա յիս բարիս։

Փրկիչ բոլորից,

Փութա զիս փըրկել,

Փորձութեանց մեղաց։

Քաւիչ յանցանաց,

Քաւեա զօրհնաբանս,

Քեզ երգել ըզփառս։

Աստուածածնին բարեխօսութեամբ Յիշեա՛, Տէր եւ ողորմեա։